Policia e Shtetit në Tiranë ka finalizuar një operacion të koduar “Hallka e parë”, duke arrestuar dy kushërinj të dyshuar për trafikim të lëndëve narkotike, të cilët furnizonin grupe të ndryshme me kokainë në kryeqytet.
“Si rezultat i administrimit të menjëhershëm të informacioneve të siguruara në rrugë operative, për 2 shtetas që transportonin lëndë narkotike Kokainë, me qëllim shitjen, shërbimet e Komisariatit të Policisë Nr. 4 finalizuan operacionin ‘Hallka e parë’”, thuhet në njoftimin zyrtar të Policisë.
Në kuadër të operacionit, një automjet i dyshuar është ndjekur nga policia deri në vendin e quajtur “Treshi”, ku është ndaluar për kontroll. Në automjet, policia ka gjetur:
- 2 pako me 2 kg e 235 g lëndë të dyshuar narkotike kokainë
- një pistoletë e dyshuar lodër
Të arrestuarit janë shtetasit A. N., 34 vjeç, dhe S. N., 31 vjeç. Policia bën me dije se, “Nga veprimet hetimore dyshohet se dy shtetasit furnizonin me kokainë, shtetas dhe grupe, të cilat e ndanin lëndën në doza, me qëllim shitjen në zonat ‘Alliasi’ dhe ‘Oxhaku’.”
Të arrestuarit janë ndaluar në flagrancë për veprën penale “Prodhimi dhe shitja e narkotikëve”, ndërsa hetimet për identifikimin dhe ndëshkimin e të gjithë personave të përfshirë në këtë aktivitet kriminal vazhdojnë.
Materialet procedurale janë referuar Prokurorisë së Tiranës për veprime të mëtejshme ligjore.
