Një lëvizje e madhe u bë në Partinë Demokratike të Kosovës, të mërkurën.
Memli Krasniqi dorëzoi timonin e subjektit që e drejtoi për mbi katër vjet.
Fjalë të mira për udhëheqjen e Krasniqit ka qytetari Hasan Elshani nga Drenasi.
Veçse, ka pasur një moment që Elshani, nuk e ka pëlqyer lidershipin e Krasniqit.
“Ai e ka dhënë atë kontributin e vet, kur e ka marrë udhëheqjen e ka marrë në kohë shumë të vështirë se kanë shkuar dy liderët, Thaçi dhe Kadrija ka qenë kohë e vështirë, mirë e ka udhëhequr këtë PDK-në. Por mua nuk më ka pëlqyer kur ka shkuar me u taku me Kurtin dhe me Mimozën, aty kam thanë me e largu kryesia e me hi dikush tjetër. Se e ka sjellë në votime kështu me numër sa është kanë Thaçi 200 mijë”, thotë ai.
E dikush e përshëndet veprimin e Krasniqit.
“Prej momentit që janë shkuar Hashimi, Kadria, e këta në Hagë gjithmonë është ditë që PDK-ja nuk ka zëvendësim pa kanë ata. Në momentin që e ka marrë Memli Krasniqi PDK-ja ka rënie të hatashme siç po shihet Drenasi, me gjithë potencialin janë mundu me marr Drenasin, por prapë nuk munden, e murr Ramiz Lladrovci, kështu që është kanë e domosdoshme me dhënë dorëheqje Memli Krasniqi”, shprehet Xhevdet Kiqina.
“Kjo është pikë së pari zgjedhje e tij, po është në mënyrën më demokratike me u tërheqë e ka pa që nuk i ka ecë e mirë ka bo”, thotë Ibrahim Rexhepi.
E pikërisht, gara në Drenas, po vlerësohet që ndikoi në dorëheqjen e Krasniqit nga posti i kryetarit të PDK-së.
“Nuk besoj që do të prodhoj kush e di çka sepse PDK-ja pak a shumë z. Krasniqi ka qenë lider, por është udhëhequr në mënyrë kolektive. Është diçka tjetër që kësaj radhe Z.Krasniqi pagoi çmimin e udhëheqjes kolektive e barti mbi supet e veta përgjegjësinë. Nuk besoj që do të pësoj ndonjë ndryshim, ndoshta mund të jetë shembull për partitë e tjera nëse jo tani, më vonë se si veprohet kur rezultati zgjedhor nuk është ai që është synuar. Në këtë rast mendoj që kemi të bëjmë me atë që ndodhi në Drenas në rastin e z. Krasniqi, ajo si duket ka ndikuar që z.Krasniqi të largohet nga kreu i PDK-së”, shprehet Melazim Koci njohës i çështjeve politike.
E ish kryetari i Partisë Demokratike të Kosovës, Memli Krasniqi ka bërë të ditur se e ka thirrur Konventën e PDK-së për të zgjedhur kryetarin e ri të partisë më 17 nëntor.
