Një pjesëtar i Forcës së Sigurisë së Kosovës (FSK), i angazhuar në Britani të Madhe për të ndihmuar në trajnimin e personelit ushtarak ukrainas, është paraqitur para gjykatës, ku ka mohohuar akuzat për përdhunim dhe dy vepra të sulmit seksual.
I pandehuri, B.H 28 vjeç, me shërbim në kampin West Tofts në Thetford, Norfolk, po përballet me tri akuza të rënda që lidhen me një incident të ndodhur më 17 shtator në qytetin Norwich.
Sipas mediave britanike, rasti dyshohet se ka ndodhur në një shteg këmbësorësh pranë Riverside Retail Park.
Ai është dërguar në paraburgim me vendim të Gjykatës së Kurorës në Norwich, deri në fillimin e gjyqit më 7 prill të vitit të ardhshëm, i cili pritet të zgjasë pesë ditë.
Avokati i tij mbrojtës, Jonathan Goodman, ka deklaruar se, ndonëse klienti i tij e kupton gjuhën angleze, në seancat e ardhshme do të kërkohet përkthim në gjuhën shqipe, për të garantuar një proces të drejtë.
Përkthyes do të sigurohen gjithashtu edhe për tre dëshmitarë të tjerë nga FSK-ja, të cilët pritet të dëshmojnë në këtë rast.
Gjykata është informuar se dëshmitarët mund të gjenden në Kosovë gjatë periudhës së gjyqit, por FSK-ja do të sigurojë pjesëmarrjen e tyre në seancë, nëse kjo kërkohet nga autoritetet britanike.
Sipas raportimeve të BBC-së, i dyshuari ndodhet në Britani në kuadër të një misioni trajnimi për ushtarë ukrainas, i realizuar nga Ushtria Britanike në bashkëpunim me Ministrinë e Mbrojtjes së Mbretërisë së Bashkuar.
