Anëtari i Lëvizjes Vetëvendosje në Komisionin Qendror të Zgjedhjeve, Alban Krasniqi, ka reaguar pas raportimeve për manipulim të mundshëm në numërimin e votave në Mitrovicën e Jugut, ku kandidati i LVV-së, Faton Peci, është shpallur fitues në balotazh ndaj Arian Tahirit.
Në një intervistë në emisionin “Info Nata” në Tëvë1, Krasniqi ka mohuar kategorikisht akuzat, duke i quajtur ato të pavërteta dhe të motivuara politikisht.
“Kjo është një gënjeshtër e madhe dhe e dëmshme, që mund të bëhet bazë për një rast tjetër që hapet në Prokurori. Është e qëllimshme dhe e bërë me vetëdije. Këtë e them edhe bazuar në atë që më kanë thënë kolegë të mi në KQZ nga radhët e PDK-së, të cilët e dinë fare mirë që kjo lloj akuze është e pavërtetë,” tha Krasniqi.
Ai shtoi se disa përfaqësues të PDK-së po tentojnë të politizojnë procesin zgjedhor dhe të pengojnë punën e institucioneve zgjedhore.
“Unë nuk mund t’ua shuaj ndjenjën e humbjes që e kanë përjetuar në Mitrovicë për shkak të një problemi teknik. Kjo nuk lë asnjë hapësirë për të dezinformuar apo për të krijuar insinuata. Po shihet qartë se po tentohet të pengohet procesi i numërimit me një urdhër politik, që është precedent në historinë e zgjedhjeve,” theksoi ai.
Krasniqi përmendi edhe emra të lartë të PDK-së, duke i akuzuar për ndërhyrje politike në proces.
“Ky është një urdhër politik nga Sami Lushtaku dhe Memli Krasniqi. Le të dalin dhe të tregojnë se cilat janë arsyet. Sepse po i shtyjnë edhe anëtarët e tyre në KQZ të prononcohen rrejshëm në raporte, dhe për këtë duhet të angazhohet Prokuroria,” deklaroi ai.
