Anëtari i Komisionit Qendror të Zgjedhjeve nga radhët e Lëvizjes Vetëvendosje, Alban Krasniqi, ka reaguar lidhur me ndalimin e numërimit të votave në Mitrovicë,
Sipas tij, një ndërmarrje e koordinuar nga një parti politike, me ndihmën e disa individëve të tjerë dhe përfaqësuesve të saj në KQZ, ka tentuar të pengojë numërimin e votave dhe të manipulojë rezultatin zgjedhor.
Në një deklaratë të gjatë në Facebook, Krasniqi ka akuzuar kryeprokurorin Njazi Rexha – bashkëshort i asamblesistës së PDK-së, Nafije Rexha – për ndërhyrje të drejtpërdrejtë në proces.
“Mbrëmë isha dëshmitar i një ndërmarrje të organizuar kriminale nga një parti, e ndihmuar nga të tjerat, që orkestronte bashkë me anëtarët e saj në KQZ, me hetues që pa asnjë autorizim ligjor nga prokurori bllokuan numërimin dhe futën duart në materiale zgjedhore”, ka shkruar Krasniqi.
Ai ka treguar se Rexha ka urdhëruar largimin e prokurorit të rastit pa asnjë koordinim me Zyrën e Kryeprokurorit dhe koordinatoren nacionale për zgjedhje.
Krasniqi shton se Rexha e ka pranuar largimin e prokurorit për shkak të mbiemrit të njëjtë me Faton Pecin, pa dhënë bazë ligjore për këtë vendim.
Sipas Krasniqit, ndërhyrjet kanë përfshirë komunikime të vazhdueshme me anëtarin e PDK-së në KQZ dhe kanë kulmuar me urdhrin e Rexhës për ndërprerjen e procesit të numërimit në mesnatë, duke injoruar deklaratat dhe sqarimet e KQZ-së dhe ekspertëve të saj.
“Është mese urgjente që institucionet kompetente të ndërmarrin veprimet e menjëhershme ndaj zyrtarëve të lartcekur institucional të përfshirë në veprimet e tilla antiligjore dhe me prapavijë të qartë politike që kontribuuan me vetëdije dhe planifikim në kryerjen e dyshuar të veprave penale që kanë të bëjnë me keqpërdorimin e detyrës zyrtare gjatë zgjedhjeve, falsifikimin e rezultateve të votimit dhe cenimin e rendit kushtetues”, ka shkruar ai në Facebook.
Ky reagim vjen në një kohë kur Qendra Komunale e Numërimit në Mitrovicë vazhdon të jetë e mbyllur për shkak të dyshimeve për manipulim të procesit zgjedhor.
