I dërguari i posaçëm amerikan gjatë luftës në Kosovë, Christopher Hill, ka dëshmuar se ish-ambasadori Robert Gelbard në një moment i ishte referuar Ushtrisë Çlirimtare të Kosovës (UÇK) si “organizatë terroriste”.
Gjatë pyetjeve nga avokati mbrojtës i Hashim Thaçit, Luka Misetiq, Hill tha se Gelbard kishte ndërtuar këtë perceptim duke u bazuar në përvojën e tij të mëhershme në Amerikën Latine.
“Pati shumë kritika për deklaratën e Gelbard se UÇK-ja ishte organizatë terroriste, dhe kishte fjalë se kjo e kishte shpejtuar sulmin ndaj familjes Jashari. Gelbard sikur kishte dhënë dritën jeshile që kjo të ndodhte. Besoj se nuk ka provë për një gjë të tillë, por ajo është diskutuar – nëse i dërguari amerikan e quan UÇK-në terroriste, atëherë i jep sinjal serbëve të lëvizin kundër tyre,” tha Hill.
Ai shtoi se pas masakrës në Prekaz, ambasadori Gelbard ndryshoi qëndrim ndaj Serbisë dhe pati një përplasje të ashpër me Sllobodan Millosheviqin.
“Pas ngjarjes në Prekaz, Gelbard mori qëndrim shumë më të ashpër ndaj serbëve dhe pati një bisedë të ashpër me Millosheviqin. Më vonë, Millosheviqi deklaroi se nuk donte të takohej më me Gelbard. Gjithë çështja në maj filloi nga komentet e Gelbard, të ndikuara nga përvojat e tij të mëhershme,” shtoi Hill.
Diplomati amerikan theksoi se Shtetet e Bashkuara kanë një mekanizëm zyrtar për shpalljen e organizatave të huaja si terroriste dhe se UÇK-ja kurrë nuk është shpallur e tillë nga Uashingtoni.
Gjatë dëshmisë, Hill tha se në atë kohë ishte e vështirë të identifikoheshin njerëz në UÇK që flisnin me autoritet për çështjen e Kosovës.
“Robert Gelbard kishte takuar shqiptarë nga Kosova në Zvicër, për të cilët ishte thënë se ishin udhëheqës të UÇK-së, por nuk kishte prova që ata ishin realisht udhëheqës të saj,” tha Hill.
Ai kujtoi gjithashtu se çështja e Kosovës ishte përmendur edhe gjatë negociatave të Marrëveshjes së Paqes së Dejtonit, ndonëse fokusi atëherë ishte përfundimi i luftës në Bosnje.
“Më kujtohet që kam pasur biseda të drejtpërdrejta me presidentin Millosheviq në kontekstin e Marrëveshjes së Paqes së Dejtonit, sepse e dinim që Kosova do të ishte çështja tjetër e radhës,” deklaroi ai.
Hill zbuloi gjithashtu se Shtetet e Bashkuara kishin nxitur takimin e vitit 1998 ndërmjet Ibrahim Rugovës dhe Sllobodan Millosheviqit në Beograd.
“Kur ambasadori Richard Holbrooke shkoi në Prishtinë, unë isha me të dhe u ulëm me presidentin Rugova. Edhe pse nuk e kishim diskutuar më parë, Holbrooke tha se ishte ide e mirë që Rugova të takohej me Millosheviqin, sepse mendonte se ky takim do të zgjidhte shumë probleme,” tha Hill.
Ai pranoi se personalisht kishte qenë skeptik për këtë takim, duke shtuar se ai kishte ndikuar negativisht në imazhin e Rugovës tek qytetarët e Kosovës.
“Mendoj se e dëmtoi Rugovën, sepse njerëzit në Kosovë e panë se nuk mund t’i ndihmonte. Unë kisha rezerva për takimin, por Rugova nuk donte që në takimin e parë me Holbrooke të gjendej në një situatë ku refuzonte,” përfundoi Hill./tëvë1.info/
