Për më shumë se dy dekada Lidhja Demokratike e Kosovës ka qeverisur në Fushë Kosovë.
Mirëpo të dielën mbrëma, bastioni u thye.
Kandidati i Vetëvendosjes, Valon Prebreza ia doli që ta mposhtë Besnik Osmanin e LDK-së.
Me 10 mijë e 583 vota, apo 54.99%, Prebreza do ta zë karrigen në të cilën për rreth 20 vite qëndroi si kryetar Burim Berisha.
“Kjo fitore për mua do të thotë shumë, sepse nuk ka bastione më në Kosovë dhe nuk mund të llogariten si të tilla. E dyta, kjo është një kthim i pushtetit tek qytetarët e Fushë Kosovës, sepse ata e kanë pritur këtë gjë për një kohë të gjatë. Realisht, kemi pasur një pushtet mbi 20 vjet, por të larguar nga kërkesat dhe nevojave të qytetarëve”, ka thënë kryetari i zgjedhur i Fushë – Kosovës.
Garës së balotazhit, Prebreza i hyri në një koalicion me AAK-në në Fushë Kosovë, ndërkaq kundërkandidatit të tij iu bashkua PDK-ja.
“E kemi thënë publikisht që koalicioni i vetëm që ka rëndësi është me qytetarët. Qytetarët, pavarësisht koalicioneve që partitë e tjera kanë bërë, kanë treguar pjekuri të madhe në Fushë Kosovë. Ata nuk i kanë mbështetur partitë që kanë formuar koalicione të pa natyrshme, dhe këtë e kemi pritur si rezultat”, ka thënë Prebreza.
Nga ana tjetër, përkundër humbjes, Besnik Osmani vlerëson mbështetjen që mori nga qytetarët.
“Edhe pse nuk arrita të fitoj për ta udhëhequr Fushë Kosovën, ndihem thellësisht mirënjohës për përkrahjen, besimin dhe përkushtimin tuaj të sinqertë.Jam krenar për çdo aktivist, çdo familje dhe çdo qytetar që kontribuoi me shpirt e zemër. Uroj me sinqeritet fituesit e zgjedhjeve – me dëshirën që të punojnë me ndershmëri, përkushtim dhe rezultate që do t’i ndiejnë qytetarët në përditshmërinë e tyre”, ka thënë Osmani.
Nga 51 mijë e 110 qytetarë me të drejtë vote, në Fushë Kosovë të dielën votuan vetëm 19 mijë e 510 persona.
Në raundin e dytë të zgjedhjeve, përveç Fushë Kosovës, Vetëvendosje triumfoj edhe në Mitrovicë të Jugut, Gjilan dhe Obiliq.
