Ylli i futbollit, Lionel Messi, të dielën mbrëma e vizitoi stadiumin e Barcelonës që është ende duke u rinovuar, “Camp Nou”.
Ekipi i parë i Barçës të premten u kthye për të zhvilluar stërvitje para tifozëve në këtë stadium. Të pranishëm në “Camp Nou” ishin 23 mijë shikues.
“Mbrëmë u ktheva në një vend që më mungon me shpirt. Një vend ku isha jashtëzakonisht i lumtur, ku më bëtë të ndihem personi më i lumtur në botë. Shpresoj që një ditë të mund të kthehem dhe jo vetëm për të thënë lamtumirë si lojtar”, ka shkruar argjentinasi Messi.
38-vjeçari Messi është legjendë e gjigantit katalunjas. Nga Barça u largua në vitin 2021. Tashmë është pjesë e klubit nga SHBA, Inter Miami.
Puna në stadiumin “Camp Nou” kishte nisur në qershor të vitit 2023 dhe rinovimi ka kushtuar afro 1.2 miliard euro.
Stadiumi me kapacitetin më të madh në Evropë, tani do t’i zë 105 mijë shikues.
Ende nuk ka datë të saktë se kur do të kthehet Barcelona të luajë ndeshje në “Camp Nou”.
