Kombëtarja e Shqipërisë në futboll është grumbulluar të hënën në Barcelonë, ku do të përgatitet për dy ndeshjet e fundit kualifikuese për Kupën e Botës 2026.
Të enjten kuqezinjtë luajnë në udhëtim ndaj Andorrës ndërkohë më 16 nëntor është ndeshja Shqipëri – Angli, në “Air Albania” në Tiranë.
Shqipëria e synon vendin e dytë në grup, për të vazhduar në fazën e plejofit.
Pozita e dytë mund të sigurohet që të enjten, me fitore ndaj Andorrës dhe me kusht që Anglia të fitojë ndaj Serbisë në ndeshjen që zhvillohet në të njëjtën kohë në “Wembley”.
Të dy ndeshjet fillojnë në orën 20:45.
Shqipëria është në seri prej tri fitoreve dhe kjo ka bërë që lojtarët të jenë “me moral të lartë”, ka shkruar FSHF-ja.
Anglia tashmë ka siguruar biletën e Botërorit. I ka fituar të gjitha gjashtë ndeshjet dhe udhëheqë me 18 pikë. Shqipëria i ka 11 pikë, ndërsa Serbia është e treta me dhjetë. Pasojnë Letonia me pesë pikë dhe Andorra me vetëm një.
Shqipëria asnjëherë nuk ka luajtur në plejof për kualifikim në Botëror.
Më 24 mars, Shqipëria kishte fituar 3:0 në Tiranë ndaj Andorrës.
