Arian Tahiri, kandidati nga Partia Demokratike e Kosovës (PDK) për kryetar të Mitrovicës, ka falënderuar qytetarët për besimin dhe përkrahjen që i dhanë gjatë garës për kryetar të komunës.
Përmes një postimi në Facebook, Tahiri ka shprehur mirënjohjen për mbështetjen e marrë dhe ka theksuar se rezultati i zgjedhjeve është një shprehje e vullnetit të qytetarëve të Mitrovicës.
“Ju falënderoj të gjithëve për besimin dhe përkrahjen që më dhatë në garën për Kryetar të Mitrovicës. Ishte një privilegj i madh të jem pjesë e një procesi demokratik që dëshmoi pjekurinë tonë politike dhe kulturën e lartë qytetare. Rezultati i zgjedhjeve është shprehje e vullnetit tuaj dhe ky vullnet do ta ketë gjithmonë respektin tim”, ka shkruar Tahiri në Facebook.
Në postimin e tij, Tahiri ka uruar gjithashtu kandidatin e Lëvizjes Vetëvendosje, Faton Pecin për fitoren, ndërsa ka theksuar se do të vazhdojë angazhimin e tij në shërbim të qytetit dhe qytetarëve të Mitrovicës.
“Urime kundërkandidatit tim për fitoren! I uroj suksese në punën e tij për Mitrovicën. Unë do të vazhdoj të jem në shërbim të Mitrovicës dhe të të gjithë qytetarëve, me ndershmëri, përkushtim dhe dashuri për qytetin tonë, si gjithmonë.Faleminderit”, ka përfunduar ai.
Ndryshe, në balotazhin e të dielës në Mitrovicën e Jugut, bazuar në rezultatet preliminare të publikuara në faqen e KQZ-së, Peci mori 17837 vota, ndërsa Tahiri 15 mijë e 522. Në këto rezultate nuk janë të përfshira votat me kusht dhe ato me postë.
