Dy raste të fotografimit të votës janë regjistruar në qendrën e votimit “Daut Bogujevci” në Bresje të Fushë- Kosovës.
Menaxherja e kësaj qendre, Shkurte Bogujevci ka thënë se rasti i parë ka ndodhur rreth orës 8:30 dhe i dyti në 10:30.
“Sipas kryesueseve në qendrën e votimit, i kanë lajmëruar dy raste rreth orës 8:30 dhe 10:30, pastaj policia ka marrë rastin në dorë. Prokuroria është duke u marrë me rastin, janë marrë personat, janë zënë telefonat, fletëvotimet”, ka thënë ajo.
Ndërsa, Prokuroria ka bërë të ditur se për këtë rast është sekuestruar një telefon.
“Gjatë zhvillimit të hetimeve, është sekuestruar një (1) telefon, i cili do të shërbejë si provë në procedurën e mëtejme hetimore. Prokuroria Themelore në Prishtinë do të ndërmarrë të gjitha masat dhe veprimet e nevojshme konform dispozitave ligjore për ndriçimin e plotë të rastit”, ka thënë ajo.
