Kandidati i Lëvizjes Vetëvendosje për kryetar të Mitrovicës së Jugut, Faton Peci, ka përmbyllur fushatën zgjedhore me një mesazh për qytetarët e tij, duke e quajtur Mitrovicën “zemrën e Kosovës” dhe duke premtuar fillimin e një kapitulli të ri për qytetin.
Peci deklaroi se Mitrovica nuk thyhet dhe se puna e bërë në veri dhe zhvillimet pozitive në sektorin e bujqësisë janë garanci për një drejtim të sigurt të komunës.
“Mitrovica është zemra e Kosovës. Mitrovica nuk thyhet. Nga nesër hapim kapitullin e ri për Mitrovicën. S’ka Kosovë pa Mitrovicë. Rezultatet në veri e punët e mira në bujqësi janë dëshmi e garanci për drejtim të sigurt, Mitrovicë. Fitojmë bashkë!”, ka deklaruar Peci në Facebook.
Ai u bëri thirrje qytetarëve që më 9 nëntor të dalin masivisht në votime, duke theksuar se bashkimi i mitrovicasve do ta dërgojë qytetin drejt zhvillimit e stabilitetit të qëndrueshëm.
Në balotazhin e së dielës, Faton Peci do të përballet me kandidatin e PDK-së, Arian Tahiri, në një nga garat më të ngushta e më të ndjekura në vend.
