Pagë e 13 u është premtuar punëtorëve të sektorit publik.
E nga ky premtim i dhënë nga kryeministri në detyrë, Albin Kurti gjatë prezantimit të projekt buxhetit për vitin 2026, pritet të përfitojnë edhe mësimdhënësit.
Madje këtë buxhet që është miratuar të premtën që lamë pas nga Qeveria në detyrë, është përfshirë edhe zbatimi i pagës bazë me rritje prej 0.5 për qind për çdo vit përvojë pune nga 0.25 sa është tani.
Mirëpo nga Sindikata e Bashkuar kanë thënë se një gjë të tillë, Gjykata Kushtetuese e kishte obliguar që nga korriku i vitit 2024.
Por kjo nuk ka gjetur ende zbatim që më shumë se një vit e gjysmë.
“Pas ankesave që kemi bërë nga Sindikata tek Avokati i Popullit, Avokati i Popullit e ka dërguar në Kushtetuese dhe është konstatuar që ka qenë shkelje kushtetuese dhe Kushtetuesja e ka obliguar Qeverinë me përmirësu. Pra do të thotë se nuk është diçka që e ka vendos Qeveria por kjo është urdhër i Gjykatës Kushtetuese që është dashtë me zbatu Qeveria para një viti e gjysmë”, deklaroi Ymer Ymeri nga SBASh-u.
Nga kjo Sindikatë e kanë mirëpritur premtimin për pagën e 13-të, por kanë një kërkesë tjetër.
“Uroj që ta mban fjalën për pagën e 13-të për shkak se e ka propozuar në një buxhet që ende nuk ka shkuar në Kuvend dhe nuk e dimë që a ka të drejtë me qu në Kuvend apo nuk ka. Por para se të shkonte ky propozimi që është diskutabil i bëj ftesë cilësdo Qeveri që vjen që se paku me respektua Ligjin që e ka miratuar vet i cili thotë se vlera e koeficientit do të rritet në raport me rritjen ekonomike”.
Këto rritje po i mirëpret njohësi i arsimit, Rinor Qehaja.
Sipas tij, të njëjtat do të ndikojnë te mirëqenia e mësimdhënësve.
“Padyshim çfarëdo rritje në pagë qoftë edhe në koeficient që e rritë mirëqenien e mësimdhënësve por edhe gjithë shërbyesve civil është super e mirëseardhur dhe nuk besoj që mundet dikush me debatu të kundërtën. Ajo çfarë unë shpresoj që është që ky premtim të gjejë zbatim në momentin e parë dhe kjo të na kthehet në një performancë më të rritur dhe përkushtim më të rritur të komunitetit të mësimdhënësve”.
Qeveria në detyrë ka miratuar projektbuxhetin e vitit 2026 në vlerë prej 4 miliardë euro, i cili duhet të miratohet nga Kuvendi që të jetësohet.
