Një aksident trafiku në Vrellë të Istogut mbrëmjen e së premtes bëri që të pësojnë lëndime nëntë persona.
Të gjithë këta në fillim u dërguan në Spitalin e Përgjithshëm të Pejës.
Mëpas, dy prej tyre, për shkak të lëndimeve të marra, u transferuan në Qendrën Klinike Universitare të Kosovës.
Nga QKUK bënë të ditur se njëri nga të lënduarit ka pësuar një frakturë në kokë dhe gjendja e tij është e rëndë.
Sipas mjekut kujdestar Avdush Bajgora, i lënduari aktualisht ndodhet në Mjekim Intensiv.
“Ata kanë ardh mbrëmë. Njëri ka qenë më i ligshtë, e tjetri ka pasë një frakturë në kokë dhe është në trajtim, po presim. Nga parametrat vitale të dy pacientet janë në gjendje stabile, mirëpo gjendja është e rëndë pasi ka pësuar frakturë në kokë”, deklaroi ai.
E të lënduarit që po trajtoheshin në Spitalin e Pejës, pas trajtimit mjekësor, pesë prej tyre janë liruar për në shtëpi.
Kurse dy të tjerë po vazhdojnë të marrin trajtim dhe sipas këtij Spitali, janë jashtë rrezikut për jetë.
Detaje rreth aksidentit dhanë për televizionin nga Policia e Kosovës.
“Rasti vazhdon të hetohet për të kuptuar shkaqet se si ka ardhur deri tek aksidenti. Shkaktar fillimisht dyshohet të jetë njëri nga shoferët që ka qenë duke lëvizur nga Vrella në drejtim të Istogut. Duke mos u përshtatur kushteve të rrugës dhe shpejtësia joadekuate, e ka goditur veturën e parë në pjesën e prapme, veturen e dytë gjithashtu”, tha zëdhënësi i Policisë, Fadil Gashi.
Në këtë aksident, sipas Policisë, të përfshiraishin katër vetura.
Kronikë e realizuar nga gazetarja, Adea Mustafaj.
