Vetura e Policisë së Kosovës po qëndron në hyrje të Klinikës Emergjente në Prishtinë.
E zyrtarë të tjerë të policisë po qëndrojnë edhe brenda.
Kjo ruajte në spital nga forcat e rendit po bëhet për të dyshuarin e vrasjes së dyfishtë në Malishevë, Astrit Isufin.
Isufi i cili u arrestua në mëngjes nga Policia e Kosovës ka qenë i plagosur.
Detaje për gjendjen e tij ka dhënë drejtori i Emergjencës, Naser Syla.
Policia ka njoftuar se ai u arrestua jo shumë larg vendit të ngjarjes.
“Sot, më datë 07.11.2025, rreth orës 06:25, në fshatin Pllaqicë, është arritur të arrestohet personi i dyshuar A. I. (1983), mashkull kosovar. Pas arrestimit, të dyshuarit i është ofruar trajtim mjekësor, pasi i njëjti ka pasur plagë që dyshohet të jetë shkaktuar nga arma e zjarrit. Ai është dërguar për trajtim të vazhduar mjekësor”.
I dyshuari për vrasjen e dyfishtë në Golluboc të Malishevës, ka qenë i dënuar për dhunë në familje dhe kanosje nga Gjykata Themelore në Prishtinë, dega Drenas, më 16 prill 2025 me 154 ditë burgim dhe 800 euro gjobë, ndërkaq Gjykata e Apelit më 26 qershor 2025 kishte ndryshuar këtë vendim, duke dënuar A.I. me 3 muaj burgim dhe 800 euro gjobë.
Prokuroria Themelore në Prishtinë më 7 prill 2025 kishte ngritur aktakuzë ndaj A.I. për veprën penale dhunë në familje dhe kanosje.
Sipas aktakuzës që e ka publikuar “Betimi për Drejtësi”, i dyshuari të dëmtuarën, gruan e tij, në Ditën e Bajramit e kishte goditur me peshqir, duke e sulmuar me shuplaka disa herë, duke i gjuajtur pjatën e ushqimit, e duke e ngrehur dhe duke e futur në dhomë për ta rrahur me kabull rryme derisa i ishte dukur mjaftueshëm, dhe më pas duke e larguar nga shtëpia.
Derisa, i dyshuari për vrasjen e dyfishtë në Malishevë, Isufi kishte qenë i dënuar përveç që për dhunë në familje, edhe për kanosje të familjarëve të gruas. Ai bashkë me një familjar të tijin, P.I., në prill të këtij viti patën kanosur miqtë e tyre I.M. dhe M.M.
