Përzgjedhësi i Kosovës, Franco Foda, të premten e ka publikuar listën e lojtarëve të ftuar për ndeshjet e fundit të kualifikimeve të rregullta për Botërorin 2026.
Kosova më 15 nëntor në Lubjanë luan me Slloveninë, ndërsa më 18 nëntor e pret Zvicrën.
Për këto dy ndeshje rikthehet kapiteni Amir Rrahmani, i cili mungoi që nga humbja me Zvicrën në shtator. Kthehet Baton Zabërgja pas lëndimit, ndërsa faza ofanzive, apo arma kryesore e “Dardanëve” të gjithë janë gati, me Vedat Muriqin, Edon Zhegrovën, Milot Rashicën, Fisnik Asllanin, Albion Rrahmanin e Florent Muslinë.
Dy xhiro para fundit, Kosova është e dyta në Grupin B kurse synimi është të përfundohen kualifikimet të paktën në këtë pozitë. Vendi i dytë siguron plejofin, ndërsa vendi i parë biletën për Botëror.
Zvicra udhëheq në grup me 10 pikë, ndërsa Kosova i ka shtatë. Pason Sllovenia me tri pikë dhe Suedia me një.
Përzgjedhësi i Kosovës, Franco Foda, si zakonisht, ka përgatitur edhe një listë rezervë. Lojtarët nga kjo listë ftohen nëse mungon ndonjë nga lista bazike.
Në listën rezervë janë Florent Hadërgjonaj, Bersant Celina e Donat Rrudhani, por edhe Bledian Krasniqi, Rilind Nivokazi, Ron Raçi, Ismet Lushaku, Behar Neziri, Kreshnik Krasniqi, Florian Haxha e Altin Gjokaj.
