Një foshnje rreth një vjeç e gjysmë ka ndërruar jetë të enjten në Spitalin e Përgjithshëm të Pejës, ndërsa policia ka hapur hetime për rastin, i cili po trajtohet si “Trajtim i pandërgjegjshëm mjekësor”.
Sipas raportit policor, babai i fëmijës ka njoftuar se një ditë më parë e kishte dërguar foshnjen në spital për trajtim, por pas procedurave, fëmija ishte liruar për në shtëpi. Familja dyshon se kujdesi mjekësor nuk ka qenë adekuat.
Mirëpo, Spitali i Përgjithshëm në Pejë ka mohuar çdo neglizhencë nga stafi mjekësor dhe ka shprehur ngushëllime për familjen përmes një reagimi në Facebook:
“Fëmija është pranuar në spital në orën 22:15 të datës 5 nëntor me ankesa për të vjella. Pas trajtimit, gjendja e tij është stabilizuar dhe ai është liruar me rekomandimin që të përcillet nga afër,” – thuhet në reagim.
Sipas spitalit, mëngjesin pasues foshnja është sjellë sërish në gjendje të rëndë, me çrregullime të vetëdijes dhe vështirësi në frymëmarrje.
“Menjëherë është trajtuar me oksigjen, terapi mbështetëse dhe është bërë intubimi nga ekipi i anesteziologëve. Pavarësisht masave reanimatore, fëmija ka ndërruar jetë në orën 08:50,” – thuhet më tej.
Spitali ka bërë të ditur se rreth orës 09:13 ka njoftuar Policinë e Kosovës dhe institucionet kompetente, sipas protokolleve ligjore.
Me urdhër të prokurorit, trupi i pajetë është dërguar në Institutin e Mjekësisë Ligjore për obduksion, në mënyrë që të përcaktohet shkaku i saktë i vdekjes.
