Analisti politik Xhevdet Pozhari, në emisionin “Këndi i debatit” në Tëvë1, ka komentuar propozimin e Glauk Konjufcës nga Lëvizja Vetëvendosje për postin e mandatarit për formimin e Qeverisë së re.
Pozhari tha se kjo situatë ka ardhur pas një rënieje të lehtë të votave të Vetëvendosjes, duke theksuar se opozita fillimisht kishte bllokuar procesin, por në fund pranoi një kandidat të VV-së.
“Sot kemi një situatë kur VV-ja ka dalë me 42%. Ka pasur një rënie të lehtë të votave, rreth 30 mijë më pak nga zgjedhjet e kaluara. Ndoshta për këtë arsye kanë filluar përsëri ambiciet dhe pazaret. Pra, ata që e bllokuan procesin deri më tani, filluan së pari me kontestimin e emrit të znj. Haxhiu, por në fund prapë votuan një kandidat të VV-së,” tha Pozhari.
Ai shtoi se ky veprim i Kurtit tregon një përpjekje për të ulur tensionet dhe për të siguruar kalimin e buxhetit.
“Tash e sa kohë e diskutojmë që krejt ky mllef është ndaj z. Kurti. Por, për dallim nga pararendësit e tij, Kurti po dëshmon të kundërtën. Mua më ka befasuar – një njeri që është shpallur personi më i votuar, del dhe thotë: ‘Në rregull, nëse është toksifikuar kaq shumë atmosfera dhe njerëzit opozitar janë kaq kundër meje, atëherë ja ku është Konjufca, të cilin e keni kërkuar për kryeparlamentar, me qëllim që të votohet buxheti,’” u shpreh Pozhari.
Sipas tij, vendimi i Kurtit për të propozuar Konjufcën është një lëvizje politike që synon stabilitetin dhe shmangien e zgjedhjeve të reja.
