Shefi i Zyrës së Bashkimit Evropian në Kosovë, Aivo Orav, në një konferencë për media ka deklaruar se për t’i ndihmuar Kosovës në rrugën drejt Bashkimit Evropian, është e nevojshme të ketë partnerë.
Sipas tij, Shqipëria dhe Mali i Zi janë në rrugën e duhur për t’u bërë pjesë e BE-së.
Orav theksoi se në këtë aspekt dhe në ngjarjet e fundit që po kalon Kosova, ky vit mund të konsiderohet si një vit i humbur.
Ai shtoi se elita politike në Kosovë duhet të bashkohet për të siguruar një shumicë që do të mbështesë Planin e Rritjes.
“Në shumë vende kemi pare progres të jashtëzakonshme, fqinjët tuaj Shqipëria dhe Mali i Zi janë ne rrugën e duhur. Më lejoni të them shumë qartë, për të ndihmuar juve në rrugën e Bashkimit Evropian, duhet të kemi partnerë. Në këtë aspekt ku po kalojmë është e pamundur, ky vit është i humbur. Elita politike në Kosove duhet të bëhet bashkë përtej dallimeve politike për të siguruar një shumice për Planin e rritjes. Liria e shprehjes duhet te përmirësohet, duke përfshirë ligjin për RTK-ne dhe Komisionin e Pavarur”, ka deklaruar Orav.
Tutje Orav u ka bërë thirrje partive politike që të bashkohen përtej ndasive dhe të krijojnë një shumicë të fuqishme që do të mundësojë zbatimin e reformave dhe ratifikimin e marrëveshjeve të rëndësishme për zhvillimin e Kosovës.
“Jemi në një kohë vendimtare për Kosovën, Ballkanin Perëndimor dhe Bashkimin Evropian. Për BE-në, zgjerimi është një imperativ strategjik – një investim në stabilitet, siguri dhe prosperitet”, ka thënë Orav gjatë konferencës për media të martën bashkë me kryeministrin në detyrë Albin Kurti, ku po prezantohen të gjeturat e Raportit të Progresit./teve1.info/
