Presidentja e Republikës së Kosovës, Vjosa Osmani, ka pritur sot në takim ambasadorin e Bashkimit Evropian në Kosovë, Aivo Orav, me ç’rast ka pranuar Raportin për Kosovën 2025 të Komisionit Evropian.
Sipas njoftimit të Presidencës, gjatë takimit është diskutuar për gjetjet e raportit, përparimin e arritur nga Kosova në disa fusha si dhe sfidat që mbeten për t’u adresuar.
“Gjatë takimit u diskutua mbi gjetjet e raportit, i cili vlerëson pozitivisht progresin e Kosovës në disa fusha, por njëkohësisht evidenton edhe sfidat që mbeten për t’u adresuar,” thuhet në njoftim.
Presidentja Osmani ka theksuar se gjetjet e raportit duhet të trajtohen me prioritet, në mënyrë që Kosova të ecë përpara me hapa të vendosur në procesin e integrimit evropian.
“Këto gjetje duhet të trajtohen me prioritet, me qëllim që Kosova të vazhdojë me hapa të vendosur dhe në ballë të reformave drejt anëtarësimit në Bashkimin Evropian,” ka deklaruar Osmani.
Tutje, presidentja ka theksuar rëndësinë e këtij procesi për zhvillimin e vendit dhe për stabilitetin rajonal.
“Ky proces kontribuon jo vetëm në prosperitetin dhe zhvillimin e qëndrueshëm të vendit, por edhe në paqen dhe sigurinë afatgjatë në rajon e më gjerë,” thuhet në njoftimin e Presidencës.
