Kombëtarja e Shqipërisë në futboll, këtë muaj mund të shkruajë një kapitull të rëndësishëm në historinë e saj.
“Kuqezinjtë” e drejtuar nga Sylvinho, i luajnë dy ndeshjet e fundit të kualifikimeve për Botërorin 2026 dhe gjasat i kanë të mëdha të sigurojnë “play-offin”.
Më 13 nëntor, Shqipëria luan në udhëtim kundër Andorrës, ndërsa tri ditë më vonë, përballet me Anglinë në stadiumin “Air Albania” në Tiranë.
Shqipëria ka 11 pikë dhe është e dyta në Grupin K, pozitë kjo që në fund të ciklit kualifikues dërgon në fazën “play-off”, ku kërkohet një biletë për Botërorin që vitin tjetër mbahet në SHBA, Meksikë dhe Kanada.
Dilema kryesore për Sylvinhon që ende nuk e ka publikuar listën, mbetet faza e sulmit për shkak se vetëm Arbër Hoxha e Jasir Asani kanë dhënë shenja pozitive.
Mirlind Daku ka 9 ndeshje që nuk shënon gol, Armando Broja po përdoret shumë pak te Burnley, Rey Manaj nuk ka realizuar në tri ndeshje me ekipin e tij, ndërsa Nedim Bajrami nuk po përdoret fare nga Rangersi.
