Mesfushori i Kombëtares së Shqipërisë, Medon Berisha është përfshirë në formacionin më të mirë të javës në Serie A.
“Tuttomercatoweb” e ka futur Berishën në 11-shen e xhiros së dhjetë pas paraqitjes fantastike që e pati në ndeshjen kundër Fiorentinës.
Në fakt, Berisha ia siguroi fitoren Lecces 1:0 pasi shënoi golin e vetëm në këtë përballje dhe gjithashtu u shpall lojtari i ndeshjes.
Berisha është vlerësuar me notën 8 dhe është prej lojtarëve me notën më të lartë në formacionin 4-2-3-1 të xhiros së dhjetë, pjesë e të cilit është edhe bashkëlojtari i tij te Lecce dhe Shqipëria, Ylber Ramadani.
Berisha, të cilit këtë sezon i është besuar fanella me numrin 10 po shkëlqen te Lecce, ku në 8 ndeshje kampionale ka shënuar 2 gola dhe ka bërë 1 asistim.
