I pari që erdhi në takim në presidencë ishte kreu i Aleancës për Ardhmërinë e Kosovës, Ramush Haradinaj.
Pas tij, erdhën edhe krerët e partive tjera politike në vend që iu përgjigjën ftesës së presidentes së vendit, Vjosa Osmani të premten për te diskutuar rreth situatës politike në vend.
Diskutimi i cili zgjati rreth dy orë u bë larg syrit të medieve.
E pasi përfundoi takimi për në qeveri me nguti u nis kryeministri në detyrë, Albin Kurti.
Ndërsa, se çfarë kishin diskutuar brenda tregoi në foltore shefja e shtetit, Vjosa Osmani.
Ajo tha që me partitë është diskutuar rreth situatës në të cilën gjendet vendi pas dështimit të kreut të Lëvizjes Vetëvendosje, Albin Kurti për ta formuar qeverinë.
Osmani tha që nuk ka parë unitet tek paritë për të gjetur një gjuhë të përbashkët për formimin e qeverisë së re dhe zgjidhur çështjen e buxhetit.
Megjithatë, presidentja theksoi se synon të shmang zgjedhjet e reja
Presidentja theksoi që deri më 5 nëntor, do të vendos nëse do të shpallë zgjedhje apo do ta mandatojë mandatarin e dytë për formimin e qeverisë.
Veçse para kësaj date do ta takojë edhe një herë kryeministrin në detyrë, me kërkesë të tij.
Osmani, këtu foli edhe për çështjen e buxhetit.
“Kërkova një rrugë me dakordim të partive për procedim të buxhetit dhe Planit të Rritjes. Nuk kishte gatishmëri nga një numër i madh për procedim të buxhetit, por unë propozova që të shikojmë mundësi të tjera kushtetuese që është zgjatja buxhetore që së paku deri më 31 mars 2026 qytetarët të mos përballem me situatë ku nuk kanë paga dhe mirëqenie. Kjo çështje nga disa u shqyrtua, do të jem në kontakt me partitë nëse ekziston një mundësi e tillë”, deklaroi ajo.
Tutje, Osmani ka theksuar se në takim është përmendur nga disa parti edhe çështja e zgjedhjes së presidentit.
“Kjo çështje është ngritur nga disa prej pjesëmarrësve për të paralajmëruar një situatë që mund të përballemi si vend. Ta zëmë ka zgjedhje në dhjetor, pastaj merr disa muaj kohë deri t’i kemi institucionet, dhe pastaj sapo ta kemi një qeveri, menjëherë në mungesë kuorumi prej 2/3 menjëherë vendi shkon në zgjedhje të reja për shkak të dështimit të zgjedhjes së presidentit. Një situatë e tillë u përmend, për të paralajmëruar se mund të kemi dy palë zgjedhje në 3-4 muajt në vijim që është situatë e rëndë jo vetëm për KQZ, por edhe si situatë ku qytetarët për periudhë të gjatë të mos i kenë institucionet”.
Të vendosur për zgjedhje, pasi thanë se askush nuk i ka numrat për shumicën u panë në Partinë Demokratike të Kosovës.
Zgjedhjet si opsion të vetëm i panë edhe në Lidhjen Demokratike të Kosovës.
Ndërsa, nga Aleanca për Ardhmërinë e Kosovës thanë që 7 ose 14 dhjetori mund të jenë data opsionale për zgjedhje të reja nacionale.
Zgjedhjet parlamentare u mbajtën në Kosovë më 9 shkurt të vitit 2025.
