Të premten miratuan buxhetin për vitin 2026.
Kryeministri në detyrë, Albin Kurti, teksa prezantoi buxhetin në vlerë prej 4 miliardë euro, e vlerësoi atë “me shumë risi”.
Mirëpo për këtë vendim, po konsiderohet se Qeveria në detyrë nuk ka kompetencë ligjore.
“Qeveria në detyrë, sipas ligjit për qeverinë nuk e ka për kompetencë që të propozojë buxhetin për qeverinë e Kosovës siç e kemi thënë edhe në reagim kjo kompetencë i takon vetëm qeverisë në dorëheqje e jo qeverisë që i ka përfundua mandati siç e kemi në rastin konkret për këtë arsye qeveria në detyrë sikurse në rastin konkret nuk e ka të drejtën e miratimit të projektbuxhetit në Kuvendin e Republikës së Kosovës edhe për më tepër kjo është çështje konceptuale për shkak se kjo qeveri nuk është zgjedhur nga ky kuvend dhe ky kuvend nuk mund ti japë buxhet një qeverie të cilën ajo vetë nuk e ka zgjedhur”, deklaroi Gëzim Shala nga IKD.
Edhe katërmbëdhjetë organizatat joqeveritare (OJQ), përmes një reagimi të përbashkët, thanë se veprimi i Qeverisë në detyrë bie në kundërshtim me kërkesat ligjore.
“Projektligji për Buxhetin e Republikës së Kosovës për vitin 2026 mund të propozohej nga Qeveria në detyrë, në perputhje me Ligjin për Qeverinë. Megjithatë, siç kemi theksuar dhe në letrën e dërguar, ky proces do duhej të zhvillohet në pajtueshmëri të plotë me Kushtetutën, Ligjin dhe aktgjykimin e Gjykatës Supreme. Të njëjtat përcaktojnë qartë se një person nuk mund të ushtrojë njëkohësisht dy funksione, si anëtar i Qeverisë dhe si deputet”.
Por ndryshe mendon njohësi i Kushtetutës, Mazllum Baraliu.
Sipas tij, qeveria në detyrë ka bazë ligjore për ta propozuar buxhetin dhe kompetencat e saj nuk mungojnë.
“Sa i përket bazës ligjore, Ligji për buxhetin, neni 31 paragrafi 5 thotë që edhe Qeveria në detyrë mund t’ia propozojë Kuvendit planin e buxhetit për vitin 2026, kështu që baza ligjore mendoj që nuk mungon. Qeveria, me Ligjin për Qeverinë dhe me ligjet e tjera në fuqi ka edhe autoritet edhe autorizim edhe kompetenca që në përputhje me ligjet në fuqi të marrë vendime të caktuara që janë në interes me prioritete”, deklaroi Baraliu.
Kurti ka njoftuar që projektbuxheti për vitin 2026 do t’i dërgohet Kuvendit për shqyrtim gjatë kësaj të premte, duke përfshirë edhe ndarjet buxhetore për komunat Prishtinë, Gjilan dhe Zubin Potok.
Kronikë e realizuar nga gazetarja Jona Kelmendi.
