Deputetja e Lidhjes Demokratike të Kosovës (LDK), Hykmete Bajrami, ka reaguar pas vendimit të Qeverisë në detyrë për miratimin e Projektbuxhetit për vitin 2026.
Përmes një postimi në Facebook, Bajrami ka akuzuar Lëvizjen Vetëvendosje (VV) se ka “uzurpuar zyrat e Qeverisë”, duke miratuar buxhetin në kohën kur vendi ndodhet në pritje të zgjedhjeve të jashtëzakonshme.
“Grupi Parlamentar i Vetëvendosjes që ka uzurpuar zyrat e Qeverisë aprovoi sot buxhetin për vitin 2026. Ka mundësi që buxheti i vitit 2026 të shkojë në 8 miliardë e pagat e pensionet të rriten disafish në kohën kur pritet vendimi për shpalljen e zgjedhjeve të jashtëzakonshme,” ka shkruar Bajrami.
Deputetja ka shtuar se, sipas saj, veprimet e VV-së po e çojnë shtetin drejt rrënimit, ndërsa ka theksuar se qytetarët duhet ta ndalojnë këtë proces përmes votës.
“Prokuroria Speciale ka mundur ta ndalë këtë maskaradë. Tash, duhet ta ndalim me votë. E, do ta ndalim me votë,” ka përfunduar Bajrami.
