Në këtë gjendje ishte kohë më parë.
E këtë të enjte dukej krejtësisht ndryshe, ky objekt në oborrin e kampusit univeristiar pranë Administratës Qendrore në Universitetin e Prishtinës.
Dyshime në lidhje me këtë ndërtim, u hodhën nga Universiteti “Hasan Prishtina”.
Universiteti kishte pasur të njëjtën kërkesë edhe kohë më parë.
“Për punime të dyshimta në këtë pjesë të hapësirës së shfrytëzuar nga UP-ja, Inspekcioni i Komunës së Prishtinës ishte njoftuar edhe më 23 shtator 2025 dhe gjithashtu edhe më 25 tetor 2025, në natën kur u ndërtua me material të fortë shtesa e objektit, ndërsa drejtori i Inspekcionit bashkë me zyrtarë të UP-së dolën në vendin e ngjarjes të hënën, më 27 tetor 2025. Për më shumë, në hapësirën ku u shtua ky ndërtim ka dyshime të bazuara se zhvillohen edhe veprimtari të dyshimta që mund të mos kenë leje dhe nuk përkojnë me aktivitetet që duhet të organizohen në një kampus universitar”, thuhet nga UP.
E nga Drejtoria e Inspeksionit në Prishtinë kanë treguar për Tëvë1 se punimet në këtë objekt janë ndërprerë tashmë.
“Inspektorët kanë qene ne vendngjarje dhe kanë nxjerre vendim për ndërprerje te punimeve. Nga ajo çfarë kam unë si informacion, punimet janë zhvillu ne te njëjtin gabarit te objektit te vjetër dhe nuk behet fjale për ndonjë shtese te objektit ekzistues. Kryesisht ka pas të bëjë me renovim te brendshëm, ndërrim te kulmit dhe fasadim dekorativ”, thuhet nga drejtoria.
Gjatë ditëve në vijim, pritet të merret një vendim në lidhje me këtë objekt.
