Pas mbledhjes së Kryesisë së Kuvendit, nënkryetarja nga LVV-ja, Albulena Haxhiu, ka deklaruar se gjatë mbledhjes ka vërejtur qasje destruktive dhe kapriço politike.
Ajo ka theksuar se në këtë situatë të pazakontë, të gjithë duhej të ishin të unifikuar, pasi siç tha vendi nuk është përballur më parë me një rrethanë të tillë.
“Buxheti mund të shfrytëzohet deri në shkurt të vitit të ardhshëm. Nëse ne do të kemi zgjedhje të reja edhe në vitin tjetër, nuk do të kemi buxhet as për zgjedhjet e reja të jashtëzakonshme, në rast se do s’do të biem dakord për emrin e presidentit/presidentes. Në vend të përplasjes politike, unë sot pashë kapriço politike, qasje destruktive. Në vend se të ishin të gjithë të unifikuar, pasi nuk kemi pasur një situatë të cilën nuk mund ta marrim si shembull nga e kaluara, pasi nuk kemi pasur një situatë të njëjtë në të kaluarën, të paktën sot është dashur të ketë vullnet të dëshmuar politik për t’i tejkaluar bashkërisht këto çështje”, ka thënë Haxhiu.
