Vetëm dy ditë para afatit të caktuar për ekzekutimin e urdhëresës për sjellje me detyrim në gjykatë të ministrit në detyrë të Punëve të Brendshme, Xhelal Sveçla, Fitore Pacolli dhe Salih Zyba, Gjykata Themelore e Prishtinës ka konfirmuar se urdhëresa mbetet ende aktive.
Zëdhënësja e gjykatës, Mirlinda Gashi, për tëvë1.info ka bërë të ditur se procedura penale kundër të pandehurve është ende në zhvillim në Departamentin e Përgjithshëm Penal.
“Referuar kërkesës tuaj për informata ju njoftojmë se në Gjykatën Themelore në Prishtinë – Departamenti i Përgjithshëm Penal, është duke u zhvilluar procedura penale kundër të pandehurve, D.M., XH.S., S.Z., dhe F.P.D., për shkak që secili veç e veç kanë kryer veprën penale Përdorimi i armës apo mjetit të rrezikshëm, nga neni 375 paragrafi 1 dhe veprës penale Pengimi i personit zyrtar në kryerjen e detyrës zyrtare nga neni 409 paragrafi i KPRK-së,” deklaroi Gashi.
Ajo sqaroi se në seancën e mbajtur më 16 shtator 2025, të pandehurit F.P.D., S.Z. dhe XH.S. munguan pa arsye, megjithëse ishin ftuar zyrtarisht.
Pas kësaj, gjyqtari i çështjes, Sabit Sadikaj, më 18 shtator lëshoi urdhëresë për sjellje me detyrim ndaj tyre dhe i kërkoi Policisë së Kosovës të ndërmarrë veprimet e nevojshme.
“Në seancën e shqyrtimit gjyqësor të datës 16.09.2025, të pandehurit F.P.D., S.Z., dhe XH.S., edhe pse ishin ftuar me procesverbalin e seancës së shqyrtimit paraprak, të njëjtit kanë munguar në seancë, ndërsa mungesën nuk e kanë arsyetuar. Gjyqtari i kësaj çështje penale, Sabit Sadikaj, bazuar në një gjendje të tillë të fakteve, jashtë seancës me datë 18.09.2025 ka lëshuar Urdhëresë për sjellje me detyrim kundër të pandehurve F.P.D., S.Z., dhe XH.S., dhe ka urdhëruar Policinë e Kosovës që të ndërmarrë veprimet e duhura, në mënyrë që të mund të ndërmerren veprimet e mëtejme procedurale nga gjykata dhe të vendoset lidhur me këtë çështje penalo-juridike. Urdhëresën do ta ekzekutojë Policia e Kosovës, ashtu që tre të pandehurit duhet të sillen në gjykatë me datë 31.10.2025, në ora 10:00,” konfirmoi zëdhënësja e Gjykatës Themelore të Prishtinës.
