Kapiteni i Kombëtares së Kosovës, Amir Rrahmani këtë vikend do të kthehet në formacionin startues te skuadra e Napolit.
Rrahmani pritet të startojë nga minuta e parë në duelin kundër Comos, të cilin Napoli e luan të shtunën në shtëpi, në kuadër të xhiros së 11-t në kampionatin italian.
Për shkak të lëndimit, Rrahmani i ka munguar Napolit në dhjetë ndeshjet e fundit në të gjitha garat, por do të jetë i gatshëm për Comon.
Në fakt, Rrahmani është rikuperuar nga lëndimi dhe ishte ftuar për ndeshjen ndaj Lecces, që Napoli e fitoi 1:0 të martën mbrëma, por që nuk u aktivizua.
Rrahmani këtë ndeshje e përcolli nga stoli, ndërsa deri më tani ka vetëm dy paraqitje në kampionatin italian këtë sezon.
Po ashtu, Rrahmani pritet të jetë i gatshëm edhe për Kosovën që muajin tjetër i luan dy ndeshjet e fundit dhe të rëndësishme në kualifikimet për Botërorin 2026.
31-vjeçari i ka munguar “Dardanëve” në tri ndeshjet e fundit, dy fitoret ndaj Suedisë dhe barazimin me Slloveninë.
