Lëvizja Vetëvendosjes dhe Aleanca për Ardhmërinë e Kosovës, kanë nënshkruar marrëveshje bashkëpunimi për raundin e dytë të zgjedhjeve për kryetar komune në Prizren.
Marrëveshja është nënshkruar nga kandidati i LVV-së për kryetar të Prizrenit, Artan Abrashi dhe kryetari i degës së AAK-së në këtë komunë, Besnik Krasniqi.
Abrashi ka thënë se më këtë marrëveshje synojnë të ndërtojnë një qeverisje të drejtë, transparente dhe zhvillimore.
“Sot, në Prizren, Lëvizja Vetëvendosje! – Qendra në Prizren, e përfaqësuar nga unë si kryetar, dhe Aleanca për Ardhmërinë e Kosovës, e përfaqësuar nga kryetari z. Besnik Krasniqi, nënshkruam një marrëveshje bashkëpunimi për të ndërtuar një qeverisje të drejtë, transparente dhe zhvillimore për qytetin tonë. Ky bashkëpunim ka vetëm një qëllim: t’i shërbejmë qytetarëve të Prizrenit dhe të garantojmë që çdo projekt, çdo investim e çdo vendim të jetë në dobi të komunitetit tonë”, ka shkruar Abrashi.
Në Prizren në raundin e dytë do të përballen Shaqir Totaj i PDK-së dhe Artan Abrashi i LVV-së.
Në raundin e parë, Shaqir Totaj ka marrë 26,427 vota apo 41.45%, Artan Abrashi ka 19,375 vota apo 30,39%. Besnik Krasniqi i AAK-së ka 2,214 vota apo 3,47%.
