Avokati serb BogdanIvanisheviq ka reaguar ashpër pas zhvillimeve të fundit në Serbi, duke i cilësuar ato si “shqetësuese dhe zbuluese të prirjeve të rrezikshme pro-ruse në politikën dhe shoqërinë serbe.”
Në një postim në X, Ivanisheviq ka shkruar se “udhëheqja shtetërore dhe Kisha Ortodokse Serbe kanë hyrë formalisht në një aleancë me shërbimin rus të inteligjencës”, duke iu referuar fjalimit të shefit të shërbimit sekret rus, SergejNarishkin, gjatë një ngjarjeje ku u prezantua themelimi i organizatës “Aleanca fashiste ruso-serbe”.
Sipas Ivanisheviq, ky hap përbën një afrim të hapur të strukturave shtetërore dhe fetare të Serbisë me shërbimet sekrete të Moskës, çka tregon, siç thekson ai, se “regjimi aktual e ka bërë tashmë zgjedhjen e tij gjeopolitike”.
Ai komentoi gjithashtu edhe zhvillimet brenda lëvizjes studentore dhe qytetare në Serbi, duke thënë se “krahu nacionalist” i saj tashmë ka marrë mbështetjen formale të partive Dveri dhe KreniPromeni (Nisu Lëviz dhe Nise Ndryshimin).
Ivanisheviq paralajmëroi se ky bllok ideologjik është “më afër Aleancës fashiste ruso-serbe sesa krahut pro-evropian të studentëve”.
“Nëse deri më tani ideja ka qenë që të shkojmë të gjithë bashkë drejt ndryshimit të pushtetit, e për më pas do të shohim, nuk jam i sigurt se kjo është e mundur nga tani e tutje,” shkroi ai, duke shtuar se “qytetarët duhet të jenë të kujdesshëm se kë po mbështesin, pasi tani janë dy realitete shumë të ndryshme.”
Në përfundim, Ivanisheviq vlerësoi se ndikimi rus dhe përfshirja e Kishës Ortodokse Serbe në jetën politike po krijon ndarje të thella edhe brenda lëvizjeve opozitare, gjë që, sipas tij, mund të minojë çdo përpjekje për ndryshim demokratik në Serbi.
