Zëvendësministri në detyrë i Infrastrukturës, Hysen Durmishi, ka njoftuar se javën e kaluar ka nënshkruar një vendim për mbrojtjen paraprake të Malit Mokna dhe Liqenit të Ujmanit.
Durmishi theksoi se ky vendim shënon një nga momentet më të rëndësishme për mbrojtjen e mjedisit në Kosovë, duke përfshirë një zonë të pasur me biodiversitet dhe peizazhe me rëndësi të veçantë ekologjike dhe shkencore.
Ai shtoi se pas një studimi njëvjeçar në terren, është arritur në përfundimin se kjo zonë ka vlera të jashtëzakonshme natyrore.
Me këtë vendim, sipërfaqja prej 192.19 km² e Malit Mokna dhe Liqenit të Ujmanit do të vendoset nën mbrojtje paraprake, duke e ngritur në 12.4% përqindjen e territorit të Kosovës që mbrohet ligjërisht.
“Të dashur qytetarë, javën e kaluar kam nënshkruar vendimin për mbrojtje paraprake të “Malit Mokna dhe Liqenit të Ujmanit”, një nga vendimet më të rëndësishme për mbrojtjen e natyrës në vendin tonë. Me këtë vendim, Republika e Kosovës bëhet shteti me përqindjen më të lartë të territorit nën mbrojtje të natyrës në gjithë Ballkanin Perëndimor. Pas një studimi njëvjeçar në terren, është konstatuar se kjo zonë përbën pasuri të rrallë natyrore, me biodiversitet të pasur dhe peizazhe me rëndësi të veçantë ekologjike e shkencore. Zona me sipërfaqe prej 192.19 km² tashmë vihet nën mbrojtje paraprake, duke e ngritur në 12.4% përqindjen e territorit të Kosovës që mbrohet ligjërisht”, ka shkruar ai në Facebook.
