Lidhja Demokratike e Kosovës dhe Partia Demokratike e Kosovës kanë arritur marrëveshje për raundin e dytë të zgjedhjeve në Fushë – Kosovë.
Lajmin e ka bërë të ditur kandidati i LDK-së për kryetar të Fushë-Kosovës, Besnik Osmani
Në balotazh do të përballet Valon Prebreza i Lëvizjes Vetëvendosje me Besnik Osmanin e LDK-së.
Në raundin e parë më 12 tetor, Prebreza doli i pari me 45.15 për qind të votave, ndërsa Osmani i dyti me 36.66 për qind. I treti ishte Rrahim Tërnava i PDK-së me 16.15 për qind.
“Është arritur koalicioni i madh për të mirën e të gjithë qytetarëve të Komunës së Fushë Kosovës, që i thotë PO zhvillimit, mirëqenies dhe përparimit. Në këtë frymë bashkëpunimi, Lidhja Demokratike e Kosovës dhe Partia Demokratike e Kosovës do të ecin bashkë për prosperitetin e të gjithë qytetarëve, për Fushë-Kosovën tonë. Gjatë këtyre ditëve, dy degët tona kanë punuar së bashku në hartimin e planit qeverisës dhe, në koordinim të plotë edhe me qendrën, kemi nënshkruar marrëveshjen për qeverisjen gjithëpërfshirëse për mandatin e ardhshëm qeverisës. Kjo marrëveshje është shprehje e përgjegjësisë politike dhe e vullnetit të përbashkët për ta çuar Fushë Kosovën përpara, me një qeverisje moderne, transparente dhe në shërbim të qytetarëve”, ka shkruar Osmani në Facebook.
LDK në këtë komunë ka marrëveshje edhe me Nismën Socialdemokrate.
Ndërsa LVV me AAK-në.
