Gjatë prezantimit të programit të tij qeverisës, mandatari Albin Kurti njoftoi se planifikon të shpenzojë 1 miliard euro për mbrojtjen gjatë mandatit të ardhshëm, duke theksuar se “bota sot është më e paparashikueshme dhe e pasigurt që nga fundi i Luftës së Dytë Botërore”.
Ai shtoi se këto investime do të realizohen në përkrahje të bashkëpunimit me SHBA-në, BE-në dhe NATO-n.
Kurti theksoi se gjatë mandatit të ardhshëm do të ndërmerren hapa të rëndësishëm për zhvillimin e industrisë ushtarake të Kosovës, përfshirë rritjen e numrit të ushtarëve dhe oficerëve, si dhe ndërtimin e fabrikave për municione dhe dronë në vend.
“Në katër vitet e ardhshme do të forcojmë aleancat tona, do të investojmë 1 miliard euro në mbrojtje, do të rekrutojmë ushtarë të rinj, do të funksionalizojmë fabrikën e municionit dhe do të zhvillojmë industrinë ushtarake të Kosovës, prodhuar ‘Made in Kosova’,” tha ai.
