Lidhja Demokratike e Kosovës ka reaguar ashpër pas incidentit të ndodhur sot gjatë një interviste publike, ku deputeti i kësaj partie, Armend Zemaj është përballur me provokime verbale dhe sulm fizik.
Në reagimin e faqes së LDK-së në Facebook, LDK e ka cilësuar ngjarjen si të papranueshme dhe si një cenim të drejtpërdrejtë ndaj sigurisë personale të një përfaqësuesi të zgjedhur të popullit dhe integritetit të institucioneve demokratike të vendit.
“Sulmet, qoftë verbale apo fizike, ndaj përfaqësuesve të popullit dhe zyrtarëve të LDK-së, përbëjnë cenim të dinjitetit institucional dhe të kulturës demokratike mbi të cilën ndërtohet shteti ynë. Mendimi ndryshe është vlerë themelore e demokracisë, por shprehja e tij kurrë nuk mund të kalojë në fyerje apo dhunë,” thuhet në reagimin e partisë.
Derisa, LDK ka shprehur solidaritet të plotë me deputetin Zemaj dhe ka kërkuar nga organet e rendit dhe ligjit që të sqarojnë me përgjegjësi rrethanat e incidentit.
“Për Lidhjen Demokratike të Kosovës, respekti ndaj institucioneve dhe përfaqësuesve të tyre është respekt ndaj vetë shtetit dhe rendit demokratik. Kultura e debatit, e respektit dhe e dinjitetit duhet të mbizotërojë në jetën publike, si garanci e paqes shoqërore dhe e funksionimit demokratik të shoqërisë sonë,” thuhet në reagim./teve1.info/
