Njësitë Antikontrabandë të Doganës së Kosovës kanë zhvilluar një operacion kontrolli në qytetin e Pejës, në ambientet e një barnatoreje që ishte nën dyshime për veprimtari të kundërligjshme.
Sipas njoftimit zyrtar të Doganës, gjatë kontrollit, zyrtarët doganorë kanë zbuluar një hapësirë të improvizuar, bunker, ku janë gjetur dhe sekuestruar 468 pako barnash me banderola të shteteve të huaja, të cilat dyshohet se janë kontrabanduar në territorin e Republikës së Kosovës.
Në njoftim thuhet se:
“Barnat e gjetura nuk kishin asnjë dokumentacion të origjinës apo të importit ligjor dhe dyshohet se janë futur në vend përmes kanaleve të jashtëligjshme, duke shmangur kontrollet doganore dhe standardet e sigurisë farmaceutike.”
Pas zbulimit të barnave, Dogana ka inicuar procedurat përkatëse hetimore, ndërsa rasti po trajtohet në bashkëpunim me institucionet kompetente.
Në fund të njoftimit, Dogana e Kosovës ka theksuar përkushtimin e saj për të luftuar kontrabandën dhe për të mbrojtur shëndetin publik:
“Dogana e Kosovës mbetet e përkushtuar në luftimin e kontrabandës, mbrojtjen e shëndetit publik dhe sigurimin e tregut të brendshëm nga produktet e paligjshme.”
Ky aksion është pjesë e operacioneve të vazhdueshme të Doganës për të parandaluar qarkullimin e mallrave të paligjshme dhe për të garantuar sigurinë e konsumatorëve në vend.
