Gjykata Themelore në Ferizaj, Departamenti për të Mitur, ka caktuar masën e paraburgimit prej një muaji ndaj një të mituri, i dyshuar për veprën penale të kontrabandimit me migrantë.
Sipas propozimit të Prokurorisë Themelore të Ferizajt, i mituri dyshohet se më 21 tetor 2025 në fshatin S., Komuna Hani i Elezit, ka organizuar dhe kontrabanduar ilegalisht kalimin e pesë migrantëve me shtetësi kineze përmes vijës kufitare Kosovë – Maqedoni e Veriut.
Personat e përfshirë në këtë rast janë identifikuar me inicialet X.G., P.Zh., Z.Ë., L.H.1 dhe L.H.2.
Sipas gjykatës, i mituri kishte bërë marrëveshje me migrantët në Serbi për të marrë nga secili pagesën prej 20 eurosh, më pas i kishte dërguar në Kosovë dhe i kishte ndihmuar të kalonin ilegalisht kufirin drejt Maqedonisë së Veriut.
“Pas mbajtjes së seancës dëgjimore dhe analizimit të shkresave të lëndës, gjyqtari i procedurës paraprake i Departamentit për të Mitur – Shabi Idrizi, ka vlerësuar se ekziston dyshimi i bazuar, se më datë 21 tetor 2025, rreth orës 20:20 minuta, në fshatin S., Komuna Hani i Eleezit, në koordinatat e MGRS, i mituri me qëllim të kontrabandimit me migrant ka organizuar – kontrabanduar kalimin e jashtligjshëm të migrantëve, saktësisht 5 persona me shtetësi Kineze dhe atë X.G., P.Zh., Z.Ë., L.H.1., L.H.2., duke kaluar vijën kufitare Kosovë – Maqedoni e Veriut, në atë mënyrë që i mituri fillimisht ishte takuar dhe kishte komunikuar me personat në fjalë në shtetin e Republikës së Sërbisë dhe kishin bërë marrëveshje që për secilin person të marrë pagesë në vlerë prej 20.00 €, më pas i merr personat në fjalë nga shteti i Sërbisë, hyjnë në shtetin e Kosovës, ku i mituri siguron një automjet, ku e drejton një person deri më tani i panjohur dhe i fusin në veturë që të gjithë, më pas të njëjtit i dërgon në drejtim të shtetit të Maqedonisë, saktësisht tek vija kufitare Kosovë – Maqedoni e Veriut, ku aty nga njësiti patrollues kufitar janë vërejtur dhe kanë arritur t`i ndalojnë që të gjthë dhe t`i shoqërojnë në stacionin policor kufitar në Rajonin Lindje Kaçanik, ku i mituri është arrestuar”, thuhet në njoftim.
Gjykatësi i procedurës paraprake, Shabi Idrizi, ka aprovuar kërkesën e prokurorit për caktimin e paraburgimit, i cili do të zgjasë një muaj.
“Me këtë rast palët njoftohen se ankesa kundër këtij aktvendimi nuk e shtynë ekzekutimin e tij”, theksohet në njoftim.
Pesë kinezë hynë ilegalisht nga Serbia në Kosovë, arrestohet shoqëruesi
