Publicisti dhe analisti Kim Mehmeti ka komentuar me ironi deklaratën e Izair Mexhitit, një prej figurave të njohura politike në Maqedoninë e Veriut, i cili së fundi u shpreh se “është koha për një gjeneratë të re politike” dhe se lideri i BDI-së, Ali Ahmeti, është humbësi më i madh i zgjedhjeve të fundit.
Në emisionin “Këndi i Kimit” në Tëvë1, Mehmeti vuri në dyshim sinqeritetin e deklaratës së Mexhitit, duke e cilësuar atë si qesharake për shkak të së kaluarës së tij të gjatë në pushtet.
“Është pak qesharake kjo deklaratë, sepse Mexhiti ka qenë 20 vjet në pushtet. Të jesh për dy dekada në pushtet, të jesh kryetar komune dhe pastaj të quash veten gjeneratë e re, është njësoj sikur unë të them se jam një nga shkrimtarët e rinj vetëm sepse kam botuar një libër të ri,” tha Mehmeti me ironi.
Izair Mexhiti, kryetar dhe kandidati i komunës së Çairit dhe një prej figurave të ndara nga BDI-ja për të formuar lëvizjen opozitare “Lidhja Europiane për Ndryshim”, kishte deklaruar një ditë më parë në emisionin “Këndi i Debatit” se:
“Ali Ahmeti është humbësi më i madh i këtyre zgjedhjeve. Ka ardhur koha për një gjeneratë të re politike.”
Zgjedhjet e fundit parlamentare në Maqedoninë e Veriut sollën rezultate të përziera për partitë shqiptare, ku Lidhja Europiane për Ndryshim ka fituar terren në krahasim me zgjedhjet e kaluara, ndërsa BDI-ja ka pësuar rënie në mbështetje, sipas rezultateve të para.
