Klubi i basketbollit Peja, do të zbresë sonte në parket për të zhvilluar ndeshjen e dytë në kuadër të Ligës ENBL, një garë që po tërheq skuadra cilësore nga e gjithë Evropa.
Pas humbjes në xhiron e parë ndaj skuadrës letoneze Riga Zelli, ku pejanët nuk arritën të përmbysin epërsinë e kundërshtarit, ata janë të motivuar të kthehen te fitorja dhe të regjistrojnë pikët e para në këtë edicion.
Kjo sfidë e dytë për skuadrën nga Dukagjini do të jetë kundër ekipit kroat Dubrava, një skuadër me traditë të gjatë në basketbollin kroat dhe me një përbërje të përzier mes lojtarëve vendas dhe të huaj.
Skuadra e Pejës ka udhëtuar dje drejt Zagrebit, Kroaci, ku ka zhvilluar seancën e fundit stërvitore në palestrën ku do të luhet ndeshja.
Ndeshja zhvillohet sonte me fillim nga ora 20:00, dhe për të gjithë adhuruesit e basketbollit që dëshirojnë ta ndjekin, ajo do të transmetohet drejtpërdrejt në kanalin zyrtar të ENBL-së në YouTube.
Sa i përket Superligës, Peja e ka nisur në mënyrë fantastike sezonin, ku ka fituar 2 ndeshje në po aq të luajtura.
