Në emisionin “Këndi i Debatit” në Tëvë1, kandidati për kryetar të Komunës së Tetovë, Bilall Kasami, është shprehur për fitoren e tij në raundin e parë të zgjedhjeve lokale dhe për përplasjet që ai i quan çështje propagande politike.
Ai tha se kundërshtarët e tij nuk kanë përgatitur një strategji të bazuar në program, por në sulm personal dhe përbaltje ndaj figurës së tij, ndaj shqiptarëve dhe maqedonasve.
“Vlerësoj që kundërshtarët aktualë në fakt patën një strategji jo politike, por që dha rezultatet e tyre dhe kjo ka qenë në drejtim të përbaltjes së figurës sime – edhe tek shqiptarët, edhe tek maqedonasit. Është një rast shumë tipik, ndoshta nga përpjekjet e PR‑it që duhet të shfrytëzohen si model” – tha Kasami.
Ai u ndal në akuzat që i janë bërë, sipas tij, se në Tetovë ai do të ndërtonte një kishë serbe dhe një xhami në sheshin kryesor të qytetit, të cilat ai i përshkroi si propagandë të ulët.
“Tek shqiptarët më kanë akuzuar se në Tetovë do të ndërtoj një kishë serbe, dhe tek maqedonasit ortodoks me kanë akuzuar se do të ndërtojë një xhami në sheshin e Tetovës. Asnjë rast tjetër nuk kanë të bëjnë me realitetin, sepse kryetari i komunës nuk ndërton as kishë e as xhami – për më shumë, me ligj në Maqedoninë e Veriut është e ndaluar ndërtimi i një kishe tjetër jashtë kishës maqedonase.” – tha ai.
Kasami deklaroi se të gjitha këto akuza janë vetëm për të dobësuar pozitën e tij në prag të balotazhit, dhe për të ndikuar në votuesit e të dy komuniteteve.
