Koordinatori i Institutit Hidrometeorologjik të Kosovës, Besim Aliu tha se tanimë kanë 12 stacione automatike nga të cilat u vinë të gjitha të dhënat në kohë reale.
“Ne e kemi thënë shumë herë që reshjet në vendet e caktuara nuk mund t’i dimë, pasi që Instituti Meteorologjik i Kosovës nuk ka radar, është e mjerueshme që pas 22 viteve nuk kemi radar. Deri në vitin 2013 ne i kemi pasur vetëm termometrat, kemi punuar në mënyrë manuele. Kemi bërë matje klasike siç janë bërë në shekullin 20. Tani Instituti ynë ka 12 stacione automatike ku të gjitha të dhënat vinë në kohë reale”, tha ai në emisionin “Ditari” në Tëvë1.
Ai tha se kjo pajisje kushton rreth 1 milion e 200 mijë euro.
“Është dikund 1 milion e 200 mijë euro. Me bisedat që kemi pasur nga Shqipëria, ata na kanë thënë se me një radar që mund ta vendosim në qendër të Kosovës, dikund në Malishevë, në një pikë të lartë, e cila do të ketë një rreze veprimi prej 100 kilometra. Aty do të përfshihet i gjithë territori i Kosovës dhe më gjerë”, është shprehur Aliu. /teve1.info/
