Autore: Jona Kelmendi
Dhe pas katër ditësh, motorët me mbishkrimin “Liria ka emër” u panë në Hagë të Holandës.
Këtu, rreth 150 motoristë nga të gjitha trevat shqiptare, po kërkojnë drejtësi, për ish-krerët e UÇK-së, të cilët prej rreth pesë vitesh ndodhen në paraburgim.
Gjenerali Nasim Haradinaj, është i bindur se zhurma e motorëve u dëgjua edhe brenda qendrës së paraburgimit, ku ndodhen Hashim Thaçi, Kadri Veseli, Jakup Krasniqi dhe Rexhep Selimi.
“Unë mendoj që asnjëherë më shumë në pikëpamje simbolike por edhe vizuale nuk është legjitimu kjo padrejtësi, kjo protestë dhe kjo revoltë për atë padrejtësi që po zhvillohet në dhomat e gjykatës. Kemi kalu pranë gjykatës ku po mbahet gjykimi, kemi kalu pranë dhomave ku ata shokët tanë rrinë. E kemi edhe lajmin më të mire edhe besoj jam i sigurt që bubullimat e motorrëve i kanë dëgju edhe shokët brenda unë mendoj që kjo është edhe një kurajo për ta”, tha Haradinaj.
Në Hagë, motoristët shqiptarë i priti një nikoqire e veçantë.
Në tubim mori pjesë edhe deputetja e Kuvendit të Kosovës, Shqipe Selimi, njëherish gruaja e Rexhep Selimit.
Ajo ishte në Hagë për një vizitë tek bashkëshorti.
“Nuk mundeni me marrë me mend qka ka ndodh, kanë qenë njerëzit në rrugë tu na përshëndet, kanë qenë policët duke na e bërë shqiponjën me dorë. Ka pasë njerëz nga Kosova,Finlanda, Gjermania, Zvicra, kemi pasë njerëz jo shqiptarë që kanë ardhë me motorë pikërisht në përkrahje të kësaj vetëm pse e kanë ditë”, tha Haradinaj.
E në Hagë, më 14 shtator u organizua edhe protesta madhështore, në kërkim të drejtësisë për ish-krerët e UÇK-së.
