Komisioni Qendror i Zgjedhjeve ka njoftuar se aktivitetet në të gjitha Qendrat Komunale të Numërimit (QKN) janë përmbyllur të shtunën, gjashtë ditë pas ditës së zgjedhjeve, ndërkohë, në Qendrën e Numërimit dhe Rezultateve (QNR), po vazhdon dita e tretë e numërimit të fletëvotimeve nga votimi jashtë Kosovës.
Sipas njoftimit, deri rreth orës 24:00 të ditës së shtunë, janë përmbyllur rezultatet për 2,571 vendvotime të rregullta për zgjedhjet e kryetarëve të komunave, si dhe për subjektet politike në zgjedhjet për kuvende komunale.
Këto rezultate janë përpunuar nga gjithsej 5,142 kuti votimesh që përfshijnë të dy llojet e zgjedhjeve.
Në njoftim specifikohet se aktivitetet në Qendrat Komunale të Numërimit, të cilat filluan pas datës 12 tetor, janë përfunduar në 38 komuna të Kosovës, me ditë të caktuara për përmbylljen në secilën komunë.
“Aktivitetet në Qendrat Komunale të Numërimit, të cilat filluan pas ditës së zgjedhjeve të 12 tetorit, janë përmbyllur në 38 komunat, sipas ditëve në vazhdim: Hani i Elezit (e hënë, 13 tetor), Junik, Mamushë, Zveçan, Ranillug, Partesh (e martë, 14 tetor), Mitrovicë e Veriut, Zubin Potok, Deçan, Shtime, Klinë, Shtërpcë, Obiliq, Istog, Skenderaj (e mërkurë, 15 tetor), Viti, Rahovec, Suharekë, Dragash, Kaçanik, Lipjan, Fushë Kosovë, Ferizaj, Kamenicë, Drenas, Vushtrri (e enjte, 16 tetor), Gjakovë, Graçanicë dhe Mitrovicë e Jugut, Podujevë, Pejë, Kllokot, Leposaviq (e premte, 17 tetor), Gjilan, Malishevë, Prizren dhe Prishtinë (e shtunë, 18 tetor)”, thuhet në njoftim.
Po ashtu, është njoftuar se në Qendrën e Numërimit dhe Rezultateve (QNR) vazhdon procesi i numërimit të fletëvotimeve për votimin jashtë Kosovës.
Deri të dielën në orën 10:00, janë numëruar 54 kuti për zgjedhjet e kryetarëve të komunave dhe 45 kuti të tjera për kuvende komunale.
“Këto fletëvotime i takojnë procesit të votimit jashtë Kosovës, i realizuar përmes postës nga 17 shtatori deri më 11 tetor 2025, të cilat janë tërhequr më 13 dhe 14 tetor nga kutitë postare të KQZ-së në 22 shtete të ndryshme si dhe nga kutia postare e KQZ-së në Kosovë. Nga këto 23 kuti postare, janë tërhequr 33,841 pako të supozuara me fletëvotime, të cilat i janë nënshtruar procesit të vlerësimit. Vlerësimi ka për qëllim të vërtetojë se pako është dërguar nga votuesi i regjistruar për të votuar nga jashtë Kosovës. Numri i pakove të supozuara me fletëvotime që janë aprovuar është 29,636, ndërkaq janë refuzuar 3,977. Arsyeja më e shprehur se përse janë refuzuar këto pako, në 3,660 raste mungon dëftesa e regjistrimit, një dokument, me të dhëna unike, që votuesi i regjistruar e pranon nga KQZ-ja”, thuhet në njoftim.
