Disa njësite të Forcës së Sigurisë së Kosovës, u panë rrugëve të veriut.
Kjo prezencë e ushtrisë sipas FSK-së ishte e paqëllimshme, duke sqaruar se ushtarët kishin gabuar rrugën.
Mirëpo, edhe si veprim i paqëllimshëm, po kritikohet nga njohësit e fushës.
“Edhe në rast se ka ndodhë gabimisht, është diçka e shëmtuar për një ushtri që të humbasë rrugën në territorin e vet. Baza e edukimit ushtarak fillon me njohjen e përdorimit të busullës dhe të hartës topografike. Edhe në rastin tjetër, nëse ka qenë kjo e qëllimshme ose e planifikuar nga dikush, edhe kjo është e shëmtuar pasi që është shkelur një marrëveshje e cila është bërë me aletatët tanë”, tha njohësi i sigurisë, Fadil Kajtazi.
Televizioni ka dërguar pyetje në Ministri të Mbrojtjes dhe në FSK nëse ndaj pjesëtarëve që ishin prezent në ato njësite është ndërmarrë ndonjë veprim, mirëpo nuk ka marrë përgjigje.
Aktualisht, në fuqi është një marrëveshje mes KFOR-it dhe Qeverisë së Republikës së Kosovës, që për çdo lëvizje të FSK në pjesën veriore, paraprakisht duhet koordinim me KFOR-in.
Kjo ka shpresë se mund të ndryshojë.
“Ekziston një marrëveshje në vitin 2013, në bazë të së cilës Forca e Sigurisë së Kosovës mund të intervenojë në pjesën veriore vetëm nëse lejohet nga KFOR-i, dhe për rastet emergjente, si vërshimet, zjarret. Mirëpo, mendoj se në të ardhmen jo shumë të largët, institucionet tona së bashku me faktorin ndërkombëtar duhet t’ia japin mundësinë që FSK-ja të veprojë në tërë territorin e Republikës së Kosovës, edhe në jug edhe në veri, pasi që parashihet edhe me Kushtetutë dhe me ligj”, tha njohësi i sigurisë, Refki Morina.
Për herë të fundit, pas koordinimit me KFOR-in, FSK ishte në korrik të këtij viti në Ujman, për të ndihmuar në nxjerrjen e trupit të një mërgimtari nga uji.
