Kryetari i PDK-së, Memli Krasniqi, ka komentuar tubimin e madh në Tiranë në mbështetje të ish-krerëve të Ushtrisë Çlirimtare të Kosovës, duke e cilësuar atë si një shprehje të emocioneve, krenarisë dhe bashkimit të shqiptarëve.
Përmes një postimi në Facebook, Krasniqi tha se vetëm lufta e drejtë e UÇK-së dhe kërkesa për drejtësi për historinë mund të bashkojë shqiptarët në këtë mënyrë.
“Sot, Tirana u bë zëri i përbashkët i shqiptarëve anekënd botës. Për Hashim Thaçin, Kadri Veselin, Jakup Krasniqin, Rexhep Selimin dhe shokët e tyre – jemi bashkë deri në fund. Deri në ditën kur heronjtë tanë të luftës dhe të paqes të kthehen në mesin tonë, të lirë e krenarë. Kërkesa është e qartë: drejtësi dhe vetëm drejtësi! Liri për çlirimtarët tanë!”, shkroi Krasniqi.
Ai theksoi se tubimi tregoi edhe një herë se shqiptarët janë të bashkuar në mbrojtje të historisë dhe sakrificës së ish-udhëheqësve të UÇK-së.
