Të mërkurën, dhjetëra gazetarë dorëzuan kartat e hyrjes dhe u larguan nga Pentagoni në shenjë proteste ndaj kufizimeve të reja të vendosura nga qeveria për mbulimin e ushtrisë amerikane.
Këto rregulla, të cilat u quajtën nga udhëheqësit “logjikë e shëndoshë”, parashikojnë që çdo informacion – qoftë i klasifikuar apo jo – të miratohet nga Sekretari i Mbrojtjes, Pete Hegseth, përpara publikimit, përndryshe gazetarët rrezikojnë dëbimin.
Shumica e mediave refuzuan rregullat, të cilat i konsideruan cënim të pavarësisë së shtypit. Rreth 40-50 gazetarë u larguan nga Pentagoni pas orës 4 pasdite, afati i vendosur nga Departamenti i Mbrojtjes.
Ata morën me vete sendet personale nga hapësirat e punës, përfshirë dokumente, karrige, libra e foto, shkruan Associated Press.
Presidenti Trump, duke folur nga Shtëpia e Bardhë të martën, mbështeti kufizimet: “Mendoj se ai e konsideron shtypin shumë shkatërrues në aspektin e paqes botërore… Shtypi është shumë i pandershëm.”
Gazetarja Heather Mongilio nga USNINews postoi: “Është një gjë kaq e vogël, por isha vërtet krenare që pashë fotografinë time në murin e korrespondentëve të Pentagonit… Sot, do të dorëzoj distinktivin tim. Raportimi do të vazhdojë”.
Shoqata e Shtypit e Pentagonit, me 101 anëtarë nga 56 media, kundërshtoi rregullat. Organizatat kryesore të lajmeve, nga AP e NYT te Fox e Newsmax, u kërkuan gazetarëve të mos i pranojnë kufizimet.
