Politologu Avdi Smajljaj e ka cilësuar si absurde kërkesën e kryeministrit në detyrë, Albin Kurti, drejtuar presidentes së Komisionit Evropian, Ursula von der Leyen, për fillimin e një dialogu strategjik.
Sipas Smajljajt, një kërkesë e tillë, në mungesë të institucioneve funksionale, duket më shumë si përpjekje për të relativizuar ndërprerjen e dialogut strategjik me Shtetet e Bashkuara të Amerikës.
“Kërkesa për dialog strategjik është paksa absurde, pasi nuk kemi institucione funksionale, ndërkohë që po kërkojmë një dialog të tillë. Më shumë e shoh si një lloj veprimi politik për të zbutur ose relativizuar ndërprerjen e dialogut strategjik me SHBA-në”, është shprehur Smajljaj.
Ndryshe, kryeministri në detyrë i Kosovës, Albin Kurti, gjatë takimit të zhvilluar të mërkurën, i dorëzoi presidentes së Komisionit Evropian, Ursula von der Leyen, tri letra zyrtare që shprehin interesimin e Kosovës për nisjen e dialogut strategjik në tri fusha, me qëllim thellimin e bashkëpunimit ekonomik.
“Për të forcuar bashkëpunimin ekonomik me BE-në në kuadër të iniciativës “Single Market Highëay” Kryeministri i dorëzoi Presidentes von der Leyen tri letra zyrtare me interesin e Kosovës për të nisur dialogun strategjik në tre sektorë kyç, Bujqësi, Teknologji të Informacionit dhe Komunikimit (TIK), si dhe Industri të Mbrojtjes, fusha ku Kosova sheh avantazh krahasues dhe potencial të lartë zhvillimi”, thuhet në komunikatën e Zyrës së Kryeministrit.
Kurti i dorëzon letrat zyrtare Von der Leyen për nisjen e dialogut strategjik në tre sektorë
