Presidenti i Sirisë, Ahmed al-Sharaa, i ka thënë Presidentit të Rusisë, Vladimir Putin, se kërkon të “rivendosë dhe ripërcaktojë lidhjet” me Moskën.
Al-Sharaa e bëri deklaratën të mërkurën gjatë takimit me Putinin në Moskë gjatë vizitës së tij të parë shtetërore në vendin që ka pritur al-Assad që nga mërgimi i tij nga Siria 10 muaj më parë.
“Po përpiqemi të rivendosim dhe ripërcaktojmë në një mënyrë të re natyrën e këtyre marrëdhënieve, në mënyrë që të ketë pavarësi për Sirinë, Sirinë sovrane, si dhe unitetin dhe integritetin e saj territorial dhe stabilitetin e sigurisë së saj”, i tha al-Sharaa Putinit në Kremlin.
Udhëheqësi sirian siguroi se Damasku do të respektonte të gjitha marrëveshjet e kaluara me Moskën. “Ekzistojnë marrëdhënie dypalëshe dhe interesa të përbashkëta që na lidhin me Rusinë dhe ne i respektojmë të gjitha marrëveshjet e bëra me të”, tha ai.
Duke i uruar mirëseardhjen al-Sharaa-s, Putin përshëndeti dekada të “marrëdhënieve të veçanta” midis dy vendeve, në të cilat ai pretendoi se Moska është udhëhequr gjithmonë nga interesat e popullit sirian dhe tha se qeveria e tij donte t’i zgjeronte ato.
Ai gjithashtu vlerësoi zgjedhjet e fundit parlamentare në Siri – të parat që nga përmbysja e al-Assad – duke thënë se procesi do të forconte lidhjet midis të gjitha forcave politike, ka shkruar Al Jazeera.
Sipas zyrtarëve sirianë të cituar nga agjencitë e lajmeve Reuters dhe AFP, al-Sharaa, i cili dikur drejtonte degën siriane të al-Kaedës nën emrin Abu Mohammed al-Julani, planifikon të përdorë takimin e sotëm me Putinin për t’i kërkuar Moskës dorëzimin e al-Asadit .
