Me qëllim të ngritjes së vetëdijes për parandalimin dhe trajtimin e kancerit të gjirit, në jug të Mitrovicës u organizua sot një marsh tradicional, ku morën pjesë qytetarë, përfaqësues institucionesh dhe profesionistë shëndetësorë.
Drejtori i Shëndetësisë në Komunën e Mitrovicës së Jugut, Fahri Shabani, tha se ky marsh nuk është vetëm një ecje simbolike, por një shenjë solidariteti dhe apel për kujdes e përkushtim ndaj shëndetit të grave dhe vajzave.
“Sot jemi mbledhur bashkë për ta dërguar një mesazh të fuqishëm kundër kancerit të gjirit – një sëmundje që mund të parandalohet, të trajtohet dhe të mposhtet nëse veprojmë në kohë. Çdo hap që bëjmë sot është një hap drejt shpresës dhe ndërgjegjësimit. Ftoj çdo grua dhe vajzë të kujdeset për veten, të kryejë kontrollet e rregullta dhe të mos injorojë shenjat e trupit”, tha Shabani.
Ai shtoi se kujdesi ndaj shëndetit të grave është kujdes për familjen dhe gjithë shoqërinë.
Në marsh mori pjesë edhe Saranda Jakupi, e diagnostikuar me kancer të gjirit para gjashtë vitesh, e cila ndau përvojën e saj personale me të pranishmit.
“Dje kam përfunduar ciklin e kimioterapisë dhe ndjej emocione të forta sot. Ju falënderoj të gjithëve për mbështetjen. Ju lutem, nënave dhe vajzave, bëni kontrolle të rregullta – kjo sëmundje është e fshehtë dhe mund të godasë papritur. Mos e humbni shpresën, sepse me mbështetjen e familjes dhe shoqërisë mund t’ia dilni”, u shpreh ajo.
Marshi përfundoi me një thirrje të përbashkët për solidaritet, kujdes dhe investim më të madh në shëndetin publik, me theks të veçantë në parandalimin dhe trajtimin e kancerit të gjirit./KP
