Gazetari i Tëvë1, Venhar Isufi, ka bërë publike pamje dhe informacione të reja lidhur me procesin zgjedhor në katër komunat veriore të Kosovës.
Ai njoftoi se persona të lidhur me presidentin serb Aleksandar Vuçiq kanë qëndruar afër qendrave të votimit për të ndikuar në votuesit serbë.
Në emisionin “Mesditë” në Tëvë1, Isufi deklaroi se ata persona ishin ish-pjesëtarë e Policisë së Kosovës, të cilët kishin dhënë dorëheqje në vitin 2021.
“Kemi siguruar pamje të ish-policëve që kishin dhënë dorëheqje në vitin 2021. Ata kanë qëndruar afër qendrave të vendvotimeve të dielën. Kjo tregon se këta persona janë të dërguar nga Vuçiq. Ndikimi i tij përmes Listës Serbe është shumë i rrezikshëm, pasi këta individë ende janë nën trysninë e strukturave politike serbe”, tha Isufi.
Gazetari shtoi se, përveç pamjeve, ekipi i Tëvë1 ka siguruar edhe informacione për financime të dyshimta që lidhen me organizata serbe që operojnë në veri.
“Shoqata e Kolashinëve, e cila vjen nga Novi Pazari dhe ka seli edhe në Zubin Potok, ka financuar aktivitetet e Listës Serbe. Përmes saj janë dërguar fonde për të organizuar transportin e serbëve me autobusë drejt qendrave të votimit”, ka theksuar Isufi.
Ai bëri të ditur se, ndryshe nga zgjedhjet e kaluara, këtë vit festimet e Listës Serbe pas mbylljes së votimeve ishin dukshëm më të zbehta.
“Kanë qenë vetëm 7–8 vetura që kanë dalë në shesh, rreth bustit të Car Lazarit, për të festuar rezultatin”, tha ai.
Lista Serbe, e cila vepron si degë politike e mbështetur nga qeveria e Serbisë, ka qenë për vite me radhë forca dominuese në komunat me shumicë serbe në veri të Kosovës.
Autoritetet kosovare dhe organizatat ndërkombëtare kanë ngritur shqetësime të vazhdueshme për ndërhyrjen e Beogradit në proceset zgjedhore dhe për presionin e ushtruar ndaj qytetarëve serbë për të mbështetur Listën Serbe. /teve1.info/
